Programmers

အလှအပဆိုတာ ရိုးစင်းမှုကနေ ပေါက်ဖွားလာတာ ဖြစ်ပါတယ်။ အဲဒါကြောင့် အလှအပကို ရိုးစင်းမှုထဲမှာပဲ ရှာဖွေ တွေ့ရှိနိုင်ပါလိမ့်မယ်။ Software Engineer, Developer, Programmer များအနေနဲ့ ကျွန်တော်တို့ ရေးလိုက်တဲ့ Code တွေနဲ့ ပတ်သက်လို့ သတိထားစရာတွေ အများကြီး ရှိပါတယ်။ အဲဒီအချက်များထဲမှာ − ဖတ်ရှုရန် လွယ်ကူခြင်း၊ ပြုပြင်ထိန်းသိမ်းရန် လွယ်ကူခြင်း၊ လျင်မြန်စွာ တည်ဆောက်နိုင်မှု၊ လှပသပ်ရပ်မှု − စတဲ့ အချက်များလဲ ပါရှိပါတယ်။ ဒီအရည်အသွေးများ အားလုံးအတွက် အခြေခံ အကျဆုံး လိုအပ်ချက်ကတော့ "ရိုးစင်းမှု (Simplicity)" ဖြစ်ပါတယ်။

"သူများလည်း ငါ့လိုပဲ တွေးမှာပါ" - ဆိုပြီး ယူဆတတ်တဲ့ အကျင့်တစ်ခုက လူအတော်များများမှာ ရှိနေတတ်ပါတယ်။ တကယ်တော့ ကျွန်တော်တို့ ထင်နေသလို မဟုတ်ပါဘူး။ စိတ်ပညာရှင်များက ဒီလို တွေးထင်ယူဆမှုကို "တစ်ဖက်သတ် လွဲမှား ယူဆမှု" (False Consensus Bias) လို့ ခေါ်ကြပါတယ်။ တကယ်လို့ အခြားသူတွေက မိမိတွေးထင်သလို - မတွေးတဲ့အခါ သို့မဟုတ် လိုက်မလုပ်တဲ့အခါ - မိမိရဲ့ အတွေးကို ကာကွယ်တဲ့ အနေနဲ့ ထိုသူတွေကို အမှတ်တမဲ့ "ကင်ပွန်းတပ်၊ အမည်ပေး" တတ်ကြပါတယ်။ တခါတရံ "ငါနဲ့မတူ ငါ့ရန်သူ" ဆိုတဲ့ အထိ ရောက်ရှိသွားတတ်တဲ့ အဖြစ်မျိုးပါ။

Developer, Programmer အများစု အလုပ်လုပ်တဲ့အခါ လုပ်ငန်းအချိန်ဇယားကို အစပိုင်းမှာ ဘယ်လိုပဲ အဆင်ပြေအောင် လုပ်ထားပေမယ့် နောက်ပိုင်းမှာ အလွန်အကျွံ ဖိအားပေးခံရတဲ့ အချိန်နဲ့ အခြေအနေမျိုးတွေ ကြုံလာရတတ် ပါတယ်။ အဲဒီလိုအချိန်မှာ -
* အမှန်အတိုင်း လုပ်မလား (Doing it Right)
* အမြန်ပြီးအောင် လုပ်မလား(Doing it Quick)
ဆိုတဲ့ ရွေးစရာ လမ်းတွေ ရှိလာတတ်ပါတယ်။